Lanku beka 2018-05-08

Bigarrenez martxan da Lanku Beka

 2016an pausu berri bat eman zuen Lanku Kultur Zerbitzuak enpresak, bertsoa muinean zuen emanaldi bat garatzeko beka deialdia eginez. Orduko hartan Ane Labaka bertsolariaren eta Beatriz Egiazabal ipuin kontalariaren lanak jaso zuen saria, eta hortik abiatu zen "Erradikalak gara" saioa. Geroztik dozenaka emanaldi egin dituzte.

 Bigarren deialdia martxan

 Aurten bigarrenez egin du Lankuk bekaren deialdia. Bi helburu ditu bekak: bertsolaritza muinean duen emanaldi berri bat sortu eta laguntzea eta Lankuren eta sortzaileen arteko elkarlana sustatzea. Eta eskatzen dena ere horixe da: bertsoa oinarri izango duen emanaldi berri baten gidoia eta emanaldia bera sortzea eta garatzea. Hala, beka deialdian parte hartu nahi duenak emanaldiaren inguruko txostena osatu beharko du, lau orrialdekoa gehienez, eta honako puntu hauek jasotzen dituena:

 -Emanaldiaren gaia eta ideia nagusia
 -Emanaldiak helburu izango duen publikoa
 -Gidoiaren lanketan parte hartuko duten sortzaileen perfilak, euren izenak zehaztu gabe
 -Gidoiaren laburpena eta azalpena
 -Gidoiaren 2 orrialdeko lagin bat

 Ekainaren 15ean itxiko da epea

 Lanak aurkezteko epea ekainaren 15ean itxiko da. Epaimahaiak uztailaren 2a baino lehen emango du hartutako erabakiaren berri, eta sarituak edo sarituek 3 000 euroko ordaina jasoko dute. Saritutako lana abenduaren 31 baino lehen estreinatu beharko da.

 Informazio gehiago nahi izanez gero egin klik hemen.