Hitzetik Hortzera telebista programa 2018-10-04

Hitzetik Hortzera itsasoan murgilduko da igande honetan

                  Ibai Esoain, arrantzalea eta bertsolaria

                  Orion jaio, hazi eta bizi da Ibai Esoain, 2018ko Basarri bertso-paper lehiaketako irabazlea. Aurten “Sigi-Saga” izeneko bertso-sortarekin lortu du XXXIV. Basarri saria irabaztea. Esoainek angula arrantzaren kontakizuna egiten du, pertsonaren barne motibazioetan barrena, beregan eragin handia izan zuen osaba Manuelengana hurbilduz eta baita zenbat kritika eginez ere. Eider eta biak txalupan itsasoratuko dira eta arrantza, bertsoa, inspirazioa etab izango dituzte hizpide. Mundu ezberdinak nola uztartzen diren azalduko digu Esoainek.

                  Bertso jarriak

                  XVIII. mende bukaeran bertso paperak zabaltzen ziren gehienbat gertakizunen berri emateko, denetariko gaiak jorratuz. Jendeak buruz ikasten zituen eta bertsoari iraunkortasuna emateaz gain, bertsolarigaien eskola izan ziren eta gainera molde nahiz doinu berriak zabaltzen zituzten. Gaur egun ere badute bere lekua bertso paperek eta horietako bat antolatzen diren lehiketak dira. Bermeoko saioan Uxue Alberdik Thierry Biscay musikariaren disko berrirako idatzitako “100 alargunen dantza” kantua abestuko du. 1912ko galerna izugarriaz hitz egiten du letrak, 146 arrantzale hil ziren, gehienak bermeotarrak.

                  Bermeoko Andra Marietako bertso jaialdia

                  Bertsoaldi andana entzuteko aukera izango da programan zehar. Denboraldiko bigarrenean iraila amaieran Bermeoko Andra Mari jaietan egin zen bertso-saiora joango gara bertan kantatukoak entzuteko. Oholtza gainera igo ziren Fredi Paia, Amets Arzallus, Uxue Alberdi eta Igor Elortza. Gai-jartzaile lanak Amaia Agirrek egin zituen. Horrez gain Donostiako Euskal Jaietako bertso-saiotik ere entzungo dugu bertsoaldiren bat eta baita historikorenbat berreskuratu ere.

                  Igande bazkalostean ETB1en

Hori dena igandean arratsaldeko 15:00etan Euskal Telebistako lehen katean. Eta zuzenean ikusi ezin duenak internetez ere izango dute aukera, EITBren Nahieran orrian