Bizkaian 2019-01-23

Zilekoa bertso eskolan izena emateko epea zabalik

Zilekoa Bizkaiko neska bertsolari gazteen topalekuan izen emateko epea zabalik da, urtarrilaren 31ra arte.

Ekimen honen hirugarren edizioa da aurtengoa eta helburu nagusia da Bizkaiko neska bertsolari gazteen topaleku izatea, euren arteko konfiantza-sarea sendotzea eta nesken ahalduntzean eragitea bertso eskoletatik plazarako bidean.

Miren Amuriza eta Oihana Bartraren gidaritzapean
Saioak larunbat goizetan izango dira, Miren Amurizaren eta Oihana Bartraren gidaritzapean, Larrabetzun eta Durangon.

Formatuari dagokionez, saio denek izango dute antzerako egitura: lehenengo zatian, emakume erreferentzial baten bisita, eta eurekin bizipenak konpartitzeko aukera izango da. Ostean, bertso eskola.

Otsailetik maiatzera izango da, hilean behin. Onintza Enbeita, Ine Osinaga eta Uxue Alberdi izango dira aurten gonbidatuak.