Eskolarteko Bertsolari Txapelketa 2019-02-12

Eskolartekoa hastera doa

Eskolarteko bertsolari txapelketa hastera doa, 31. izango da aurtengoa. Lehenik herrialdeetakoak jokatuko dira eta Euskal Herriko finala gero, ekainaren 8an, Saran.

15-18 urteko gaztetxoek hartzen dute parte lehiaketako atalean eta umeek lagunarteko parte hartzea izaten dute, herrialdearen arabera. Eskolartekoak idatzizko atala ere badu, herrialdeetan gauzatzen dena.

Gipuzkoan ostiralean
Gipuzkoan ekingo dio bideari ostiral honetan eta 23 parte hartzaile izango ditu bat-batean. Bi hilabetetan zenbait saio eginda, jai giroan amaituko da Lasturren, apirilaren 5ean. Egun berean egingo da Eskolartekoa Nafarroan; Arantzan elkartuko dira bertsozale gazteak.

Maiatzean jokatuko dira Araban, Bizkaian eta Lapurdi, Baxenabarre eta Zuberoan. Bizkaian lau saio egingo dira finalaren aurretik; maiatzaren 25ean finala.

Maiatzaren 25ean elkartuko dira Lapurdi, Baxenabarre eta Zuberoako bertsozale gazteak ere; Hazparnen izango dute hitzordua.

Araban bi egun hartu ohi dira, adin ezberdinetako gazteentzat: nerabeek maiatzaren 11n ospatuko dute Eskolarteko jaia, Legution, Bertsoa Bizi Gazte Egunarekin batera. Gazteagoentzako maiatzaren 25ean izango da festa.