Eskolarteko txapelketak 2019-04-08

Aitor Tatiegik irabazi du Gipuzkoako Eskolarteko txapela

Joan den ostiralean jokatu zen Gipuzkoako Eskolarteko Txapelketaren finala Lasturren, eta Aitor Tatiegi oñatiarrak jantzi zuen txapela. Bigarren postua Aner Peritz 'Euzkitze' zarauztarrak lortu zuen. Bi hauek izango dira, hortaz, Euskal Herriko Eskolarteko finalean kantatuko dutenak ekainaren 8an Saran.

Lepo bete zen Lasturko taberna zortzi bertsolari gazteak kantuan entzuteko. Maddi Aiestaran, Imanol Albizu, Uxue Alkorta, Haizea Arana, Oihana Arana eta Igauri Lopetegi izan ziren gainerako finalistak. Giro ederrean joan zen saioa, eta horixe nabarmendu zuten bi sailkatuek ere saio osteko elkarrizketan. Aitor Tatiegik "bertso bakoitzean gozatu" egin zuela aipatzen du, eta Aner Peritz ere gustura sentitu zen, bai bere buruarekin, baita jendearen harrerarekin ere.