Gipuzkoako Txapelduna - Elkarrizketa 2019-12-17

Beñat Gaztelumendi:"Pozik, beteta eta oso eskertuta nago"

Bere herrian, Añorgan, egin dugu zita 2019ko Gipuzkoako Bertsolari Txapelketako irabazlearekin. Bigarrenez jantzi du Beñat Gaztelumendik (Añorga 1987) txapela, 2015ean jantzi zuen lehenengoa.

Duela lau urtekoa bertsolaritzan eta bizitzan gorako bide batean mugarri izan zen Gaztelumendirentzat. Aurtengoa aldiz, denboraldi desoroso baten ostean berriz bertsotan gustura egin duenaren sentsazioarekin bizi du. "Ez dut sentitzen bigarren txapel bat jaso dudanik, duela lau urtekoarekin bide bat itxi nuen eta aurtengoa beste gauza bat da, beste leku baten nago eta oso pozik".

Gaur egun bertsolaritzari ekarpena nondik egin hausnartzen ari da añorgarra. Dagoen tokitik, datozen korronte berrien aurrean egokitzen asmatzeko. "Malgua izatea eta mugitzen jakitea tokatzen zait. Berritasunekin datorrenak nire ondoan izan dezala dakarrena garatzeko espazioa bat".