Prebentzio neurri gisa 2020-03-18

Koronabirusak plaza gelditu du

Koronabirusak plaza gelditu du

Bada aste batzuk koronabirusa plazan zebilela. Bolada batez kantu-gai izan da han eta hemen. Oraingoan, ordea, covid-19 birusak bertso plaza bera gelditu du, erdiz erdi. Asteburuko saio ia gehienak bertan behera gelditu dira edo atzeratu egin dira: bertso afari, jaialdi, txapelketa, emanaldi berezi... Gaur Mendaron izatekoa zen jaialdia, igandean Zegaman, Nafarroako Bardoak eta Arabako Kuadrilla artekoa, Bizkaiko Txapelketaren udaberriko fasearen aurkezpena, eskolartekoa, BBK sariketa, Erniarraitz sariketa...

Osasun gomendio eta covid-19 birusa ez zabaltzen jarraitzeko prebentzio neurri gisa etorri da bertso agenda bertan behera gelditzea. Eta ikuskizun dago egoerak zein bilakaera izango duen.

Bertsozale Elkarteak Batzarra bertan behera utzi du
Plaza bakarrik ez, Bertsozale Elkartearen jardunean ere eragin zuzena izaten ari da koronabirusa. Euskal Herri osoko ikastetxeak itxita bertsolaritza geletan lantzeko proiektua etenda dago. Bertsozale Elkarteak iragarri du asteburuan egitekoa zuen Batzar Nagusia bertan behera utzi duela, baita Bizkaiko Bertsozale Elkarteak ere.