Igandero ETB 1en 2020-03-18

Luzia Goñi gertutik, Hitzetik Hortzeran

Bertsolari basaburuarra ezagutuko dugu igandeko programan. 91 urte ditu, eta bere bertsoak eta bizi esperientziak kontatu dizkigu Tirapuko bere etxetik. Gainera, Andoaingo, Irungo, Legazpiko eta Pasaiako saioak eskainiko ditugu. Igandean, 15:00etan, Hitzetik Hortzera ETB1en.

Tirapun bizi da Luzia Goñi bertsolaria. Basaburuko Aizarotz herrian sortu zen, duela 91 urte. Oso gaztetan hasi zen lanean, eta, berak esaten duen bezala, "hamalau ofizio eta hamabost miseri" pasatutakoa da. Txikitatik izan du bertsotarako zaletasuna: hainbat bertso kantatu eta idatzi ditu, eta oraindik ere badu horretarako grinarik. Hala erakutsi digu berarekin izan dugun elkarrizketa ederrean, eta ikusgai izango duzue igandeko Hitzetik Hortzeran.

Aizarotzen sortu zen, baina bere jaioterria husten ikusi zuen artean umea zela, hiru aberatsek herriko lur guztiak erosi baitzituzten. Gai hori bertsotara eraman zuen Luziak, besteak beste, eta bere familiak eta herritarrek handik alde egin zuteneko une latza deskribatu zuen.

Leoni Etxebarren: Isildu ez zirenak

Gainera, itzalean egondako emakume bertsolarien lanak ezagutzen jarraituko dugu; Leoni Etxebarren, oraingoan. Senarra zuen Fernando Aire "Xalbador" Odolaren Mintzoa liburua amaitzeko zorian zela, argitalpenerako bertso batzuk jartzeko enkargua jaso zuen Leonik. Sorta eder-ederra egin zuen, Xalbadorren sorkuntza prozesua berak nola bizi izan zuen azalduz; ez ziren, ordea, liburuan sartu. 2016an liburua berrargitaratzearekin ekarri zituen Amets Arzallusek argitara, 40 urtez isilean egon eta gero. Oholtza eta ahotsa jarriko diegu bertso horiei igandean.


Irungo Landetxa auzoan egindako bertso bazkarira eta Legazpiko bertso afarira eramango gaitu Hitzetik Hortzerak; baita Andoainen Sahararen alde egindako bertso emanaldira eta Pasai Donibanen Emakumeen Nazioarteko Egunaren haritik izandako saiora.

Igandean, 15:00etan, Hitzetik Hortzera ETB1en; eta gerora, EITB Nahieran atarian ikusgai.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin