None 2020-10-05

Nafarroako Bertsolari Txapelketa atzeratzea erabaki du Nafarroako Bertsozale Elkarteak

Nafarroako Bertsolari Txapelketa atzeratzea erabaki du Nafarroako Bertsozale Elkarteak
2021eko urtarrila eta martxoa artean zen ospatzekoa Nafarroako 45. Bertsolari Txapelketa, baina Covid-19aren pandemiak eraginda, atzeratzea erabaki du antolakuntzak. Dena dela, plaza sustatzen jarraituko du Nafarroako Bertsozale Elkarteak.

Nafarroako Bertsolari Txapelketa ez da zegokion datetan jokatuko. Hala erabaki du Nafarroako Bertsozale Elkarteak, bere oinarriak kontsultatu eta egoera aztertu ostean. Covid-19aren pandemiak –eta hura kontrolpean hartzeko neurriek– egitasmoaren berezitasunak bermatzea zailtzen dute, eta bereziki jartzen dute ezbaian txapelketaren oinarrizko irizpidea den aukera berdintasuna. Besteak beste, honako egoerak sortu daitezke: bertsolariak konfinatu behar izatea, eta ondorioz txapelketan parte hartzeko aukera galtzea; saiotik saiora epaimahai bera bermatzeko zailtasunak izatea; saio batetik besterako aldaketak saioaren beraren aforo eta ezaugarrietan; etab. Gauzak horrela, txapelketa urtarriletik martxorako epean ez egitea erabaki du elkarte antolatzaileak. Pandemiaren bilakaeraren arabera erabakiko da data berria.

Dena dela, kultura segurua dela azpimarratu nahi du Nafarroako Bertsozale Elkarteak. Txapelketaren berezitasunak bermatzea zaila da egungo egoeran, baina aukera badago bestelako saio asko antolatzeko. Osasuna bermatu eta bertso saioak antolatzea ez dira bi gauza kontrajarri. Zentzu horretan, txapelketaren hutsunea Nafarroako bertso plaza sustatzeko baliatuko du NBEk, aurrerago zehaztuko diren egitasmoen bidez. Antolatzaile diren gainerako eragileei ere kulturaren aldeko apustuari heltzeko gonbitea luzatu nahiko genieke. Kulturak eta bertsolaritzak merezi dute.


Transmisio arloan buru belarri
Plazatik harago, bertsolaritzaren transmisioan buru belarri ari da Nafarroako Bertsozale Elkartea. Azken 35 urteetan egin bezala, aurten ere jarri dugu martxan Bertsolaritza Irakaskuntzan egitasmoa. 2020/2021 ikasturtean, hain zuzen ere, Nafarroa osoko 47 udalerritako 60 ikastetxetan ariko gara bertsolaritzaren oinarriak irakasten. Guztira, 2.800 ikaslek jasoko dute programa, zazpi irakasle espezialisten eskutik.

Bertso Eskolek ere asteon ekingo diote ikasturteari. Izen emate epea beteta, haur, gazte zein helduentzako 28 talde osatu dira, Nafarroa osoko hamabost udalerritan. Bertsogintzan sakontzeko gune dira Bertso Eskolak, eskola orduz kanpokoak; horrez gain, euskararekin jolastu eta trebatzeko eta sorkuntza gaitasunak garatzeko gune ere badira.

Bietan, Hezkuntza Arautuan zein Bertso Eskoletan, osasun prebentziorako neurri guztiak bermatzeko konpromisoa hartu du bere gain Nafarroako Bertsozale Elkarteak.

Albiste gehiago

POTOKASTAK - BERTSO UHINAK 2020-06-29

"Eta zergatik bertsoa?"

POTOKASTAK - BERTSO UHINAK 2020-06-15

Gasteizko teilatu gainean etzanda

POTOKASTAK - BERTSO UHINAK 2020-06-07

Uhinak azulejo txurietan

POTOKASTAK - BERTSO UHINAK 2020-06-01

Nolako zapatillak erabiltzen dituzu etxean egoteko?

POTOKASTAK - BERTSO UHINAK 2020-05-18

"Aspaldi da gutunik bidaltzen ez dugula"