asteburuko planak 2020-11-06

Bertso saioz lepo dator asteburua

Gaur bertan, ostiralean:

Lekeitioko Ikusgarri zineman, "Ez da kasualitatea" emanaldia musikatua Parkeko Guniak antolaturik. Kantuan Miren Amuriza, Garazi Navarro, Ane Labaka eta Nerea Ibarzabal, eta gai-jartzaile lanetan Aissa Intxausti arituko dira. Iluntzeko 20.00etatik aurrera.

Beasainen Bertso Jaialdia izango da, Usurbe Antzokian eta 19.00etan hasita. Arrano Kultur Elkarteak antolatzen duen saio honetan abestuko duten bertsolariak honako hauek dira: Maddi Aiestaran, Xabat Illarregi, Maialen Lujanbio, Aitor Sarriegi, German Urteaga eta Iker Zubeldia. Gai-jartzaile lanetan, berriz, Mikel Urteaga arituko da.

Zaldibian Zapi bete bertso jaialdiaz gozatzeko aukera izango da aurten ere. Resti pilotalekuan arratsaldeko 19.00etan hasita Amets Arzallus, Jon Maia, Maddi Ane Txoperena eta Ane Zuazubiskar arituko dira bertsotan.

Larunbatean:

Aurreneko jaialdia Aizarnazabalgo Elizan izango da, 19.00etan. Maialen Lujanbio, Aitor Mendiluze, Jon Maia eta Iker Zubeldia arituko dira, Igotz Alkortaren gaietara.

Bigarren jaialdia, aldiz, Bergaran izango da, ordu erdi beranduago hasiko dena, 19.30etan hain zuzen ere. Beñat Gaztelumendi, Aitor Sarriegi eta Jone Uria izango dira kasu honetan Kartzela Zaharrean. Ibon Leibar "Txinbo" arituko da gaiak jartzen.

Jaialdiez gain, bi bertso saio bereziz gozatzeko aukera ere egongo da. Garesek "Urpekakariak" haurrentzako bertso antzerkia jasoko du eguerdian, Eneko Arrate eta Aissa Intxausti bertsolariak protagonista. Bigarrena, "Bertsoa kontzertu" bertso musikatu emanaldia ezagutzeko parada izango da Ereñotzun, arratsaldeko 19.00etatik aurrera. Eli Pagola bertsolariak eta Manex Pagola musikariak eskainiko duten emanaldi berria da hori.

Igandean:

Bi saio antolatu dira iganderako. Alde batetik, "Ez da kasualitatea" bertso saioa Lasarte-Oriako Kultur Etxean, arratsaldeko 19.00etan. Miren Amuriza, Miren Artetxe, Ane Labaka eta Alaia Martin bertsotan, eta Amaia Agirre gaiak ematen. Ttaku euskara elkarteak eta Lasarte-Oriako bertso eskolak antolatua da saioa.

Bestalde, Etxarri-Aranatzen bertso jaialdia antolatu da 18.00etatik aurrera Kultur Etxean. Andoni Egaña, Nerea Elustondo, Eneko Lazkoz, Maialen Lujanbio eta Julio Soto izango dira oholtzaren gainean Fernando Anbustegi gai jartzailearekin batera.

Informazio gehiago eta hurrengo asteetako bertso saioen berri bertsozale elkartearen agendan izango duzue.

Lurraldez lurralde segurtasun neurriak eta egoera ezberdina dela jakinik, ez ahaztu denon eskutan dagoela bertso plaza ere eremu seguru eta zaindua izatea. Beraz, saioetan behar diren neurri guztiak bete, antolatzaileen oharrei kasu egin eta adi ibiltzeko mezua luzatu nahi dugu.