Bertsoaroa 2020 2020-11-24

Hitzak dantzan Bertso Aroaren azken txanpan

Haatik konpainiaren eskutik datorren ikuskizuna da "Errimak bi oinetan" izenekoa. Konpainiak bertsolaritzaren soinua mugimendu garaikide bihurtu du, eta atzoko eta gaurko hainbat bertsolariren errimak baliatuz, ikuskizuna eskainiko dute bost dantzarik.

Sustrai Colina, Xalbador, Aitor Mendiluze, Lazkao Txiki, Uxue Alberdi, Odei Barroso, Aitor Sarriegi, Ibon Ordoñez eta gehiagoren errimekin egingo dute dantza bost dantzarik. Igelaren bandak jarri die soinua bertsoei, eta Thierry Biscary, Maddalen Arzallus, Aitor Mendiluze, Irati Sorondo eta Anne Jauregik jarri diete ahotsa.

Saioa 19.00tan izango da Nafarroako Antzerki Eskolan eta 17.30tatik aitzina izango da gonbidapenak eskuratzeko aukera. 

Osteguneko jaialdia ere arratsaldeko 19.00etan hasiko da Nafarroako Anzterki Eskolan eta kantuan arituko diren bertsolariak honako hauek izango dira: Beñat Gaztelumendi, Eneko Lazkoz, Erika Lagoma, Josu Sanjurjo, Julio Soto eta Maialen Lujanbio. Gai-jartzaile lanetan Maialen Belarra arituko da. Ekimen honetarako ere gonbidapenak 17.30tatik aurrera lortu ahalko dira. 

Nafarroako Bertsozale elkarteak eta Iruñeko Udalak antolatzen duten Bertso Aroa zikloaren baitan hainbat saio eta ekitaldi antolatu dira azken asteetan, beti ere behar diren neurri guztiak betez, aforo mugatuekin eta erantzukizunez jokatzeko deia eginez.