Amaia Iturriotzek irabazi du aurtengo Pello Errota Sariketa

Hasiera batean azaroaren 1ean egitekoa zen aurtengo Pello Errota Bertsolari Sariketaren finala, Asteasun. Gobernuak ezarritako alarma egoera zela eta, ordea, antolatzaileek finala bertan behera uztea erabaki zuten. Hala ere, azken asteetako neurrien malgutzearekin batera, bigarren data bat jartzeko aukera ikusi eta atzoko egunez egingo zela iragarri zuten Harituz Bertsozale Taldeak eta Asteasuko Udalak. 

Bertsolari hauek hartu zuten parte finalean: Amaia Iturriotz, Erika Lagoma, Iñigo Izagirre, Izarne Zelaia, Jon Martin eta Unai Mendizabal. Aurkezle lanetan, berriz, Maddi Labaka aritu zen.

Amaia Iturriotz urretxuarrak lortu du aurtengo txapela janztea. Bigarren postua berriz, Jon Martinek eskuratu du, eta bertsorik onenaren Mikaela Elizegi saria berriz, Iñigo Izagirrek jaso du.