Abenduak 30 2020-12-29

Azken agurrak Plateruena Kafe Antzokiari

Durangoko Kafe Antzokia euskararen eta kultur sorkuntzaren birika garrantzitsu izan da azken urte hauetan eta era guztietako hamaika ekitaldia, kontzertu, ikuskizun eta bertso saio aterpetu ditu 18 urteotan. Aurretik zetozen zailtasun ekonomikoei pandemiak sortutako egoera konplexua batu zaie eta beraz, 18 urteren ondoren, Plateruena ateak itxi beharrean zela iragarri zuten. 

Azken egun hauetarako egitarau polita osatu dute eta hainbat ekitaldiz gozatzeko aukera egon da eta egongo da urtea amaitu bitartean. Hor tartean aurkitzen da Urteko Azken Bertso Saioa. Aurtengo kasuan gainera, bertso saio bikoitza izango dena: Covid-19ak urteroko zita hau ere moldatzea ekarri du eta aforo murriztuagoa dela eta, bi saio egitea erabaki zen. 

Ezer baino lehen: saio hauetarako sarrerak aspaldi agortuta daude, iragarri eta 24 orduko tartean amaitu ziren. Sentitzen dugu. 

Berbaro Kultur Elkarteak antolaturik, bi bertso saio entzuteko aukera izango da bihar, aurrenekoa 17.00tan eta bigarrena 19.00tan hasiko dira.

- Aurreneko saioa Unai Iturriagak gidatuko du eta kantuan arituko dira, Andoni Egaña, Nerea Ibarzabal, Maialen Lujanbio, Amets Arzallus, Aitor Bizkarra eta Gorka Pagonabarraga. 

- Bigarren saioan 7 protagonistetatik 4k errepikatuko dute. Gaijartzailetza Ainhoa Urienen esku geldituko da eta Durangaldeko bertsolarien ordezkariak Eneko Abasolo "Abarkas" eta Txaber Altube izango dira kasu honetan. 

Urteari agur esateaz gain, Plateruena Antzokiari berari ere agur esateko eguna izango da biharkoa, tarte baterako bai behintzat.