Eskolatik Plazara 2021-02-05

Eta hirugarrena, Altzon

Aner Peritz, Haira Aizpurua, Irantzu Idoate, Maialen Lujanbio eta Nerea Ibarzabal ariko dira bertsotan gaur zortzi Altzoko kultur etxean. 18:00etan hasiko da saioa. Sarrera doakoa da, eta gonbidapenak www.bertsozale.eus atarian eskura daitezke dagoeneko: zehazki, hemen.

Eskolatik Plazara ekimenak proposatzen duen azken eta hirugarren saioa da hau: iaz, pandemiaren eraginez, Euskal Herriko Eskolartekoan aritu ezinik geratu ziren parte-hartzaileak egun plazetan aritzen diren bertsolariekin elkartzen ditu ekimenak. Eskolartekoa antolatzen duten Ikastolen Elkarteak eta Bertsozale Elkarteak antolatu dute Eskolatik Plazara: bertsolari gazteei jendaurrean aritzeko aukera eta ikusgarritasuna eman nahi zaie horrela, bultzada handia izaten baita haientzat datozen urteetako plazei begira.

Gaur, Iruñean

Altzokoa izango da Eskolatik Plazara ekimenaren hirugarren eta azken saioa; aurretik, pasa den ostiralean, Gernika-Lumon izan zen lehena eta gaur izango da bigarrena, Iruñean. 18:00etan hasita, Nafarroako Antzerki Eskolan ariko dira kantuan Aitor Ugarte, Alaia Martin, Bittori Elizalde, Ekhiñe Zapiain, Eukene De Los Aires eta Julio Soto; Josu Sanjurjo ariko da gai jartzaile lanetan.