Bertso-eskoletarako karta jolasak, prest!

Errima kartak, gaia sortzekoak, puntua edota oina ematen dutenak... haurrek bat-batean egiteko karta jolas bilduma ederra osatu dute Bertsozale Elkarteak eta Lanku Kultur Zerbitzuek. Bertso-eskoletan eta ikastetxeetan baliatzeko materiala da.

Bertso-eskola bakoitzari bilduma bana emango zaio opari; gainera, duela zenbait hilabete material honen berri eman zenean, Bertsozale Elkarteak ale gehiago behar zituzten bertso-eskoletako kideei eskaera egiteko aukera eman zien. Horiei guztiei datozen asteetan egingo zaie banaketa herrialdeetako Bertsozale Elkarteen bidez. Elkartea jarriko da bertso-eskolekin harremanetan, egoera zail honetan iristarazteko modurik egokiena topatzeko.

Sei karta sortez osatutako bilduma honek aukera emango digu haurrekin bat-bateko ariketa ezberdinak lantzeko: puntuari erantzutea (laguntza gisa oinak emanda), azken puntua eta oinak harturik kopla edo bertsoa osatzea, 4 edo 8 oinak emanda puntutan zein bertsotan egitea, gaiak sortzea (pertsonaiak, egoerak eta emozioak konbinatuz), errimatzen duten kartak lortu eta kantuan aritzea, eta pasa hitza jolasarekin asmakizunak igartzea.

Karta jolasak PDF fitxategian ere eskuragarri daude bertsoeskola.eus atarian, hemen.

Bertsozale Elkarteko irakasle lantaldean sortu dituzte karta jolasak, eta proiektuak Eusko Jaurlaritzaren laguntza jaso du.