Planak 2021-03-12

Zer plan astebururako?

Ostirala

Gaur Iruritan Baztango Talde Feministak antolatuta bertso saioa izango da arratsaldeko 19.00tan hasita. Saioa Alkaiza, Irati Majuelo eta Alazne Untxalo arituko dira kantuan, Maialen Belarrak jarritako gaiekin.

Bilbon, Zinegoak jaialdiaren baitan "Bollo hiztegia" proiektuaren aurkezpena egingo dute 18.00tan. Hitzen glosarioa aurkeztu ondoren, Amaia Agirre eta Eli Pagolak bertso bollo saioa emango dute.

Bestalde, badira agendan maiz aurkitzen ditugun beste bi saio berezi. Aurrenekoa, "Erradikalak ginen" emanaldia. Santurtzin izango da arratsaldeko 19.00tan hasita Casa Torre jauregian. 18.00tan hasiko da "Erik eta Win" emanaldia Itziarko Burugorri ostatuan.

Larunbata

Durangaldeko bertso eskolak antolatuta, "Durangaldea Uztabarritzen" zirkuituaren aurreneko bertso saioa izango da bihar. 18.30tan hasita, Elorrioko gaztetxean izango da saioa eta kantuan arituko dira Txaber Altube, Iruri Altzerreka, Aitor Esteban eta Erika Lagoma. Gai-jartzaile lanetan arituko da Iker Apraiz.

Hiru ekitaldi berezi ere izango dira bihar. Bilbon "Gorria; bertsoa eta flamenkoa" ikuskizunaz gozatzeko aukera izango da Enkarnazio Elizan. Meñakan "Erradikalak ginen" emanaldia eskeiniko dute Andra Mari elizan. Azkenik, Urretxun, Martxoan Bertsoa egitasmoaren baitan, "Auskalo zeinek jarriak" bertso musikatuak entzuteko aukera izango da, hau ere elizan.

Igandea

Igandean ere "Erradikalak ginen" emanaldi berezia ikusteko aukera izango da. Kasu honetan, Otxandioko Gimnasioan 18.30tatik aurrera.