Bertsopaperak 2021-05-05

Abian da Iruñeko II. Bertsopaper Lehiaketa

Urte luzeetan Iruñeko Egile Berrien Lehiaketaren modalitateetako bat izan ondoren, iaz izan zuen lehen edizioa propioa Iruñeko Udalak eta Nafarroako Bertsozale Elkarteak elkarlanean antolatutako Iruñeko Bertsopaper Lehiaketak, eta aurten jarraipena izango du ekimenak.

Hiru kategoriatan banatuko da lehiaketa:

1- Txikiena, 2008an edo ondoren jaiotakoentzat

2- Gazteena, 2004 eta 2007 urteen artean jaiotakoentzat (biak barne)

3- Helduena, 2003an edo lehenago jaiotakoentzat.

Sariak

Kategoria bakoitzak sari ezberdinak izango ditu. Lehenengoan, 50 eta 150 euro arteko kultur bonoak oparituko dira. Bigarrenean, 150 eta 350 euro arteko diru-sariak. Eta hirugarrenean, 500 eta 1.500 euro artekoak. Nafarroako Bertsozale Elkarteak eta Iruñeko Udalak, gainera, helduen kategorian lehen saria eskuratzen duen obran oinarrituta ikuskizun edo emanaldi bat ekoizteko eskubidea gordeko dute.

Amaia Telletxeak, Mikel Beaumontek eta Sustrai Colinak osatuko dute epaimahaia.

Iruñeko Udalaren Kultur Sailaren webgunearen bitartez aurkeztuko ahalko dira lanak, irailaren 30era arte. Bertsozale Elkarteak xehetasun guztiak biltzen dituen webgune bat ere osatu du, bertan aurkituko dituzue lehiaketaren oinarri eta iazko sorta irabazleak, besteak beste.