...Gerturatu Eta Lau 2021-05-10

Entzuleen erabakimenari buruzkoa, bihar, Bilbon

"Zenbat erabaki hartu behar dira saio batean? Ohiko saioetan nork erabakitzen du zer? Zer erabaki behar du gai-jartzaileak? Zer bertsolariek? Zer erabaki dezake entzuleak?". Hari horietatik tiraka osatuko dute bertsolariek eta zaleek Gerturatu eta Lau ekimenaren hurrengo saioa: Gure Esku Legoke. “Saio honetan, saio arruntetan gai-jartzailearen esku egoten diren hainbat erabaki hartu beharko ditu publikoak”, aurreratu du Bertsozale Elkarteak.

Gerturatu eta Lau ostegunean abiatu zuen Bertsozale Elkarteak Donostian izandako saioarekin. Lau saiok osatuko dute ekimena, eta horietako bakoitzean gai batean jarriko da arreta, bertsolariak kantuan direla eta zaleek ere parte hartuta.

Bihar izango da hurrengoa Bilbon. Eneko Lazkoz, Jone Uria, Maider Arregi eta Oihana Iguaran ariko dira bertsotan, 18:30ean hasita, Bilborock aretoan. Gure Esku Legoke saioan entzuleen erabakimena izango da haria. Sarrera doakoa da, baina izena eman behar da aurretik Bertsozale Elkartearen atariko izen-emate orrira sartuta.