Hirugarrena 2021-05-17

Gerturatu Eta…Gasteizen

Gorputzak Esango Luke izenburuak hartuko du oraingoan GEL sigla. Bertsoaren testuari eta gorputzari buruzko saioa izango da Gerturatu Eta Lau ekimenaren baitako hirugarren hau: "Bertso saio bat baloratzen dugunean, testua baloratzeko joera izaten dugu. Bertsoa ez da testu soila, ordea. Bertsoa testu hori botatzen duen ahotsa da, ahots hori proiektatzen duen gorputza, gorputz horri eragiten dioten oholtza gaineko (bertsolaria eta gai-jartzailea) eta oholtzapeko (entzuleak) gorputzak. Harreman-sare bihurri hori ere bada bertsoa. Elementu horiekin jolas egiteko proposamena da saio hau", aurreratu du Bertsozale Elkarteak.

Bihar izango da hitzordua, asteartean; Gasteizko Baratze aretoan ariko dira, 18:30etik aurrera, Ane Labaka, Aner Peritz eta Nerea Ibarzabal. Saiora joateko asmoa izanez gero, gorde tokia honako lotura honetan izena emanda.