Udako Euskal Unibertsitatea 2021-05-17

Udako Bertso Eskola: ekainaren 29an eta 30ean, Iruñean

Gaur argitaratu du UEUk Udako Ikastaroen eskaintza xehetasunez; tartean da Bertsozale Elkarteak UEUrekin eta UPV/EHUko Mikel Laboa Katedraren laguntzarekin antolatutako Udako Bertso Eskola ikastaroa. Iruñeko Katakraken izango da, ekainaren 29an eta 30ean, goizez eta arratsaldez.

Batik bat 30 urte arteko bertsozale eta bertsolari gazteei zuzendutako ikastaroa da, nahiz eta adin tarte horretatik kanpo dauden bertsozaleek eta kulturazaleek ere eman ahalko duten izena. Bertsolaritzari buruzko ikerketak eta gogoetak partekatzeko gunea izango da Udako Bertso Eskola, baita bertsogintzaren teknika hobetzekoa ere. Ikastaroan zehar ariketa praktikoak proposatuko dira, eta landutakoa praktikan jartzeko abagunea edukiko dute ikasleek ikastaro bukaerako saioan.

25 euro balio ditu matrikulak; hemen matrikula zaitezke.

Ikastaroaren inguruko xehetasun gehiago topatuko dituzu UEUko webgunean zein Bertsozale Elkartearenean.