Plazako irakurketa 2021-05-27

Bertso plazak goranzko joera hartu du

2020 urtearen amaieran egindako bertso plazen irakurketari jarraipena ematen dioten zenbait datu kaleratu ditu Bertsozale Elkarteak.

Datu horien arabera, ez da urte hasiera ona izan bertso plazarentzat. Pandemiak eragindako krisiaren ondorioz, 2019an egin ziren bertso saioak baino %60 gutxiago egin dira aurtengo lehen hilabeteetan, eta 2020an baino %25 gutxiago; kontutan hartu behar da iazko urtearen hasiera bera ere pandemiarik gabekoa izan zela.

Edonola ere, martxotik aurrera bertso plazen kopuruak goranzko bidea hartu du eta hala jarraitzen du egun ere: apirilean 29 saio egin baziren, 47 izan dira maiatzean. Saio motari dagokionez, azken hilabeteotako joerari eusten zaio: jaialdiek eta bat-bateko bereziek betetzen dute agenda batez ere, bertso hitzorduen %91,5a, zehazki.

Azpimarratzekoa da, gainera, tokian tokiko antolatzaile askok Lanku Kultur Zerbitzuenera jotzen dutela bertso saioen antolaketarako: urtarriletik maiatzera bitarteko epea aintzat hartuz gero, 2021ean saioen %45 bideratu da kultur enpresatik, eta 2019an, %30.

Zehaztasun gehiago, www.bertsozale.eus atarian.