Astebururako planak 2021-06-09

Saio interesgarri ugari asteburuan

Besteak beste, Ziburuko 2. euskal liburu eta disko azokan bertso saioa izango da marrazkilariekin, bertso saio feminista Andoainen edota "Ez da kasualitatea" Durangon. Horrez gain, "Zapla", Argi Baltza sariketa, "Gure Aldetara" eta askoz gehiago.

Larunbatean, Ziburun 2. euskal liburu eta disko azokan, bertsotan Odei Barroso eta Maddi Ane Txoperena, eta marrazkilari lanetan berriz, Dani Fano eta Asisko Urmeneta. 12:30tan izango da saioa herriko plazan.

Durangon, igandean, "Ez da kasualitatea" bertso-saio musikatua eskainiko dute Oihana Iguaran, Erika Lagoma, Alaia Martin eta Leire Vargas bertsolariek, eta gai-jartzaile Maite Berriozabal. Musikari gisa, Araitz Bizkai eta Gari Otamendi. 13.00tan hasiko da saioa Landako gunean.

Igandean ere, Andoainen bertso- saio feminista izango da Andoaingo Bertso-Eskola eta Traka Feminista taldeak antolatuta. Maddi Aiestaran, Maider Arregi Markuleta, Nerea Ibarzabal eta Eli Pagola izango dira kantuan Goiburuko ermitan, eguerdian. Gai jartzaile Maddi Etxeberria arituko da.

Horrez gain, Gasteiz, Azpeitia, Hondarribia, Astigarraga, Altzo, Ereñotzu... bertsoaz gozatzeko aukera eder asko izango dira asteburuan zehar. Eman begirada bat datozen egunetako bertso agendari.