Gai baten inguruan 2021-07-12

Jaialdi Mundiala asteazkenean Algortan

Udako bertso zita jendetsu eta berezienetako bat asteazken honetan izango da Algortan, ALBEren eskutik: Jaialdi Mundiala. Tradizio handiko jaialdia da 900 entzule inguruko jarraipena izaten zuen urtero Algortako Bihotz Alai plazan egiten zenean. Azken urteetan Muxikebarri kulturgunean egiten ari da eta aurtengoak aforo murriztua izan arren ia 500 lagun elkartuko saioan. 

Sei bertsolari, gai baten bueltan
Arratsaldeko 19:00etan hasita, Sustrai Colina, Nerea Ibarzabal, Maialen Lujanbio, Alaia Martin, Unai Mendiburu eta Aitor Sarriegi arituko dira kantuan, Paule Loizagak aurkeztuta. Aurten ere tematika baten inguruan joango dira gaiak gai-jartzaile talde batek landuta eta tematika hori jaialdian bertan egiten da publiko.

Eszenografia ere bereziki zaintzen den saioa da eta horretan ere bada ohiko saioetatik bereizten den ekitaldia. Bertsoaldi onenen aukeraketa Bertsoa.eus-en izango da ikusgai.

ALBEk urteroko saio gehienak antolatuko ditu aurten ere
ALBEk Getxon eta eskualdean urtean 45-50 saio inguru antolatzen ditu eta aurten ere, egoera berezia izan arren, 30etik gora egingo dituzte pandemia garaiko irizpideetara ekarrita, Algortako Bertsolari Eskolako iturriek Bertsoa.eus-i adierazi diotenez. Egin ezingo den mitikoetako bat, Maratoia izango da, Algortako jaietan jaietan egiten zen bertso poteo berezi eta sonatua.

Festak egingo ez direnez saioak kultur programazioaren baitan antolatuko dira, aforo mugatuarekin eta aldez aurretik izena eman behar izaten da saiora joateko.