Hilabete barru amaituko da bertsolaritza ikertzeko deialdietara aurkezteko epea

Bertsolaritza ikertu nahi baduzu edota ikertua baduzu: kasu banatarako egokiak diren ikerketa deialdiak dituzte esku artean Mintzola Ahozko Lantegiak eta UPV/EHUko Mikel Laboa Katedrak. Pasa den uztailaren 20an aurkeztuta, eta proiektuak eta lanak aurkezteko epearen erdia baino gehiago agortuta, Mintzola Ahozko Lantegiak deialdiok gogorarazi ditu; izan ere, urriaren 20an amaituko da aurkezteko epea.

Batetik, oraindik garatu gabe dauden lanak egiteko 2.000 euroko ikerketa proiektu sari bat dago banatzeko. Master amaierako lanen proiektuak lehenetsiko badira ere, beste ikerketa lan monografiko batzuen proiektuak ere onartuko dira. Eta bestetik, azken bi ikasturteetan defendatutako Gradu Amaierako Lanentzat 500 euroko saria eskaintzen da.

Ahozko kultur sorkuntza izan behar dute oinarrian lanok: antzerkia, ipuin kontalaritza, kantagintza... edota, noski, bertsolaritza. Mami nagusira iristeko abiapuntua unibertsitateko edozein jakintza alor izan daiteke, izan artea, giza zientzia edota teknologia.

Xehetasunak Mintzolako eta Mikel Laboa Katedrako webguneetan topatuko dituzu. Ekin lanari!