Igandean Hernanin 2021-10-27

Badator XVII. Bertso Derbia

Urriaren 31ean, igandean, Reale Arenan jokatuko dute Realak eta Athleticek ligako partida gaueko 21.00etan. Urtetan egin izan dira Bertso Derbia saioak eta aurten ere partidaren aitzakian, futbola eta bertsolaritzak bat egingo dute; Bertso Derbiaren XVII. edizioa izango da aurtengoa.

Real Sociedad Fundazioak Athletic Fundazioaren, Hernaniko Udalaren eta Usandizaga Institutuaren Diseinu Grafiko Zikloaren laguntzarekin antolatu duten ekimena da. "Reala eta Athletic fundazioek gizalegezko futbol zaletasunaren alde egindako ahalegina" dela aipatzen da Realaren prentsa oharrean.

Realaren bertsolari ordezakariak Andoni Egaña, Amets Arzallus eta Maialen Lujanbio izango dira. Athleticenak berriz Jone Uria, Igor Elortza eta Onintza Enbeita. Amaia Agirre bertsolaria izango da gaiak jarriko dizkiena.

Informazio gehiago: realsociedad.eus