Nafarroako Bertsolari Txapelketa 2021 2021-11-28

Saioa Alkaiza txapeldun

Saioa Alkaiza izan da txapelduna eta bigarren izan da Eneko Lazkoz. Ondoren sailkatu dira, hurrenez hurren: Julio Soto Ezkurdia, Joanes Illarregi Marzol, Xabier Silveira Etxeberria, Xabat Illarregi Marzol, Josu Sanjurjo Altzuri eta Eneko Fernandez Maritxalar. 

Eguraldi grisak eta elurrak Iruñeko bazterrak hozten zituzten bitartean, lehenengo agurretatik berotu dute Anaitasuna finalean bildu ziren ia 1800 bertsozaleek, eta final osoan zehar iraun dute hala. Ander Aranburuk egin ditu aurkezle lanak eta Alaitz Rekondok jarri dizkie gaiak protagonistei. Agurren ondoren, zortziko nagusiko eta zortziko txikiko ofizioekin ekin diote bertsolariek. Hiru puntuei erantzun behar izan diete gero eta 10eko txikiko ofizioen txanda izan da bakarkako gaiari heldu aurretik. 

Lehen fase hori amaituta, Saioa Alkaiza Guallar eta Eneko Lazkoz Martinezek lortu dituzte puntu gehien, eta eurek jokatu dute buruz-burukoa. Zortzi bertso osatu dituzte puntuka eta jarraian, 6ko motzean aritu dira. Kartzelako lana tokatu zaie ondoren. Honakoa zuten gaia: pilula hartu duzu aurrera jarraitu ahal izateko.

Azkenean, Saioa Alkaiz nagusitu da eta Estitxu Arozena Albizuk jantzi dio txapela publikoaren txalo zaparrada artean; urte luzez Nafarroako bertsolaritzaren alde egindako lan guztia eskertu nahi izan dio Nafarroako Bertsozale Elkarteak.

Honela gelditu da azken sailkapena:

1. Saioa Alkaiza (995 puntu)
2. Eneko Lazkoz (992 puntu)
3. Julio Soto (627,5 puntu)
4. Joanes Illarregi (596 puntu)
5. Xabier Silveira (592,5 puntu)
6. Xabat Illarregi (582,5 puntu)
7. Josu Sanjurjo (580,5 puntu)
8. Eneko Fernandez (573 puntu)

Bertsoaldi onenak eta saioaren kronika

Bihar, Iruñean kantatu diren bertsoaldi onenak ikusgai izango dira Bertsoa.eus sareko plazan, eta aste hasieran ere, Jon Abrilen eskutik finalaren kronika irakurtzeko aukera ere izango da.

Txapeldunaren hitzak

Alkaiza txapeldunari Amaia Goikoetxea kazetariak egindako elkarrizketa sakona batuko duen bideoa argitaratuko dugu asteazkenean. Bertan txapeldunak orain arte txapelketan bizitakoak, txapela irabaztean sentitutakoak eta askoz gehiago entzuteko aukera izango da. Finalaren osteko gainontzeko finalisten hitzak ere eskainiko dizkizuegu.