Lanku Kultur Zerbitzuak 2022-01-18

'Kantu koplizeak', doinu ezagunetan koplak inprobisatuz

Oskar Estanga Ezkurdia bertsolari nafarrak inprobisazioa, musika edota dantza librea izan ditu lanabes hainbat proiektutan, eta oraingo honetan Maddalen Arzallus Antia bertsolari lapurtarraren ahotsa izango du bidelagun haren gitarrak. Formatu txikiko ikuskizuna izango da, ordu beteko iraupena izango duena eta edozein ingurura moldatzeko modukoa; kultur etxeak, elkarteak, liburutegiak, institutuak...

Horrela dio ikuskizunaren sinopsiak:

"Maddalen eta Oskarrentzat kantuan aritzea gozagarri da, baita kopletan inprobisatzea ere. Kantu asko eta askoren estrofa kopla neurrikoa dela ohartuta, kantu horietako batzuk hartu eta gitarraren laguntzarekin, kopletan aritzea da saioaren funtsa.

Kantuak agian ezagun zaizkizu, agian ez, kopla bakoitzean berrituko dira hala ere saioan. Kantuan musikarekin aritzearen plazerrari, koplen bizitasuna gehituko diogu hemen kantaldia freskatuko duena. Bertso saio bat eta kantaldi bat, biak izango da saio hau.

Gaiekin edo gairik gabe, aretoko saio bat edo otordu ondorengoa, entzuleen belarriak eta bihotzak goxatzea baietz lortu ahots eta ideiekin!"

Kontratazioetarako

Lanku Kultur Zerbitzuak-en laguntzaz burututako proiektua da eta beraiekin jarri kontaktuan kontratazioetarako edo informazio gehiagorako.