Ihauterietako saioak 2022-02-03

Ohitura zaharretatik aro berria

Jazko urtea berezia izan bazen ihauteri garaiko ospakizunentzat, aurtengo otsaila indartsu dator eta ospakizun asko prestatzen ari dira hilabete osoan zehar, jendearen gosea asetzeko asmoz.

Asteburu honetan, hiru hitzordu daude Zuberoa, Lapurdi eta Baxe Nafarroan.
Larunbatean, otsailaren 5ean, Arbonan, Santa eskea egingo da egun osoan zehar Ortzi Idoate eta Egoitz Zelaia bertsolariekin. Donapaleun berriz, Santibate ospatuko da, hor ere egun osoan zehar, Amikuzeko bertso eskolako kideak diren Ramuntxo Christy, Mattin Irigoyen, Paul Moal, Bittor Thikoipe eta Pettan Prebenderekin.
Igandean, otsailaren 6an, III. Bertso barrikadak antolatuko ditu Elgebarrena elkarteak Zünharre, Lexantzü eta Etxebarre herrietan Amets Arzallus eta Odei Barroso bertsolariekin. Barrikaden ondotik, bertso bazkaria egingo da Etxebarren.

Otsailaren 12an, Lekuinen Kaskarotak izango dira eta etxez etxe ibiliko da jendea Ortzi Idoate eta Maddi Ane Txoperenarekin.

Otsailaren 26an berriz, Santibate ospatuko da Baigorrin eta ostatuz ostatu Haira Aizpurua Ibargarai eta Patxi Iriart bertsolariekin joatea gonbidatzen gaitu Baigorriko Festa Komiteak.