Algortako bertsolari Eskola 2022-02-08

Maiatza arteko egitaraua iragarri du ALBEk

Algortako Bertsolari Eskolak maiatza arteko egitarau zabala iragarri du: gazte sariketa, bertso bazkari, eskualdeko txapelketa, hileroko bertso dinamika, ikastetxeetako saioa... bertsotaz non gozatu aukera zabala eta oparoa. Santa Agedako hitzorduaren ondotik, gazteen Abra Sariketa izango da otsaileko bigarren ekitaldia. Ostiral honetan jokatuko da, otsailaren 11ean, Azebarri elkartean, 19:00etan. Bertsotan, ondoko seikotea:

Maider Altuna (Arrigorriaga)
Josu Txoperena (Hendaia / Lesaka)
Julene Iturbe (Azkoitia)
Ekain Alegre (Altsasu)
Oihan Diaz (Algorta)
Unai Anda (Ametzaga)

ALBE Eguna
Aurten lehenengoz ALBETI BAT EGUNA ospatuko dute otsailaren 19an, neguko ALBEguna, zelanbait, eta otordu baten inguruan ardaztuko da. Bazkalaurretik bertso poteoa egitea da asmoa, eta bazkalostean ALBEko bertsolarien arteko bertso jolasak, bertso ariketa bereziak, bertso paperak, bertso sorpresak… Azebarri Elkartean, 14:30etan.

Uribe Kostako Bertsolari Txapelketa
Pandemiak behartutako etenaren ondotik martxoan itzuliko da Uribe Kostako Bertsolari Txapelketa. 2000. urtean hasi zen ALBE ekimen hau antolatzen, 60 urte lehenago egiten zenari jarraipena emanez. Aurtengo edizioan, 25 bertsolarik hartuko dute parte. 6 kanporaketa, hiru final erdi eta finala izango dira. Finalerdiak eta finala apirilaren 2an izango dira. Tabernetan finalerdiak, Azebarrin finala.

Bertso bazkaria apirilaren 30ean
Amets Arzallus eta Saioa Alkaiza kantuan direla bertso bazkaria egingo da Patxeko tabernan.

Maiatzean, Kanpomartxo eta Eskolatik Plazara
Maiatzean ere bi hitzordu izango ditu bertsoak ALBEren eskutik. Maiatzaren zortzian Kanpomartxo erromeria ospatuko da eta bertsolariak ere izango dira bertan. Maiatzaren 19an, berriz, Getxoko ikastetxeetan bertsolaritza lantzen duten ikasleek bertso plaza ezagutzeko parada izango dute, Andoni Egaña eta Kerman Diazekin. ALBEko bertsolari gazteak ere hartuko dute parte.

Hilero, bertso pikoteoa ALBEko bertsolariekin
2019an martxan jarri zuten dinamika da 'Ase bertso' izenez deitua. Hileko azken ostegunean bertso pikotea egiten dute Azebarri kultur txokoan, elkartu eta bertsoaz gozatzeko giroa sortuz. Bertsolari zein entzule gisa parte hartu liteke. Negu eta udaberri honetan ere dinamika honetaz gozatzeko aukera izango da ALBEren eskutik.