Aurten lehenengo edizioa 2022-02-23

Arrakastaz ekin dio Algortan ALBETI BAT egunak

Algortako Bertsolari Eskolan aspalditik egiten dute ALBEguna, udako solstizioaren garaian. Egun horren helburua da bertso eskolako belaunaldien artean ezagutza sustatzea, bai eta talde moduan geure burua indartzea eta kohesionatzea ere, Joseba Santxo ALBEko kideak Bertsoari adierazi dionez.

ALBEgunaren bilakaerari jarraiki, jabetu ziren komeni zela neguan ere halako keinua egitea; eta halaxe sortu da ALBETI BAT eguna, neguko solstizioaren inguruan, aurten lehenengoz burutu dutena.

Bazkalaurretik bertso poteoa egin zuten herriko tabernetan, herria dinamizatu eta herrian bertso-eskolak bere burua ezagutzera emateko. Ondoren bazkari ederra Azebarri kultur txokoan. Bazkalostean, bertso dinamika: bertsopaperak, bertso ariletak, bertso jolasak..., eta amaitu erromeria giroan, azken agur eta guzti.

ALBETI BAT egunaren lehendabiziko edizio honek arrakasta izan du, nahiz eta data dela eta, jende askoren hutsunea izan, Algortatik adierazi zaigunez. Ekimena abian jarrita, denboran luze irauteko filosofiaz dator. Hala izan bedi!

Uribe Kostako Bertsolari Txapelketa
ALBEko hurrengo hitzordu nagusia Uribe Kostako Bertsolari Txapelketa izango da, martxoan hasiko dena.