Atzo jokatu zen Bira 2022-03-25

Unai Mendiburu garaile Bertso Errondako Perbertsioan

Bira Kultur gunea lepo beteta zela jokatu zen atzo Bertso Errondako finala Bilbon. Josu Ibarguren, Paule Loizaga, Julene Iturbe, Asier Alcedo, Unai Mendiburu, Kerman Diaz, Ander Ucelay eta Ander Anakabe aritu ziren kantuan Perbertso lelopean antolatutako ekitaldian.

Giro ederrean igaro zen finala eta Unai Mendiburu getxoztarra gertatu zen aurtengo edizioaren irabazle, Julene Iturberekin buruz burukoa jokatuta. Perbertsioan murgilduta, argi gorriz eta lumaz apainduta egon ziren Bira Kultur Gunea eta bertsolariak.

Bertsolarien hasierako agurretatik jada, ikusleek barrez eta txaloz hartu zituzten bertsolarien bertso ateraldiak, eta halaxe jarraitu zuten amaierako agurretara arte. Ariketa jostagarriek ere lagundu zuten umorea pizten, Egunean Behin lehiaketa ezagunaren bertsio bertsozaleak, adibidez.

Bertso Errondan 20 bertsolarik hartu dute parte eta bost kanporaketa eta finala izan dira Bilboko tabernetan (Bira, Adaxka, Errondabide, La Villa eta Zirika).

(Argazkiak: Bira Kultur Gunea)