Izpura izan zen larunbatean 2022-03-28

Udaberri aireko Bertso Eguna Izpuran

Izpurako Faustin Bentaberri Gelan izan zen larunbatean aurtengo Bertso Eguna. Bertsoa ardatz zuela, musika, dantza eta marrazkia osagai artistiko izan zituen emanaldiak, Aimar Karrikak gidatuta. Irantzu Idoate lapurtarraren bertsoek eman zioten hasiera eta bukaera ekitaldiari. Jaialdian Nerea Ibarzabal, Oihana Iguaran, Sustrai Colina eta Unai Agirre aritu ziren bertsotan. Beste kultur diziplinetatik, berriz, Bilaka Kolektiboko dantzariek, Paxkal Irigoien eta Xabi Etxeberri musikariek eta Dom Campistron marrazkilariak jantzi zuten ikuskizuna.



Guztiek oso emanaldi ederra eskaini zuten. Aimar Karrikak modu berezi eta finean landu eta aurkeztu zituen gaiak, eta bertsolariek bete-betean asmatu zuten bertsotan. Musikariek iragartzen zuten bertsoaldiaren airea, Bertso Egunera bildutako 100 bertsozaleren gozagarri.

Hasierako agurren ondotik, gerrari kantari jarri zituen Karrikak, munduan gerran dauden herrien zerrenda luzea eman ondoren. "Hementxe gaude Putin ta Biden/horiek zer hitz esango/frentera eurak joan behar balute/ez zen gerrarik izango" amaitu zuen Agirrek. Supermerkatu bateko gozo apalategia eta dietan dagoena jarri zituen ondoren, Unai Agirre eta Oihana Iguaran; borobil aritu ziren hor ere.

Sustrai Colina eta Nerea Ibarzabali ariketa zaila jarri zien. Pertsona bera ziren biak, bata alde baikorra (Sustrai), ezkorra bestea (Nerea). Hamarreko txikian elkarri puntuak jarri behar zizkioten, lehen puntuan pertsonaia bat marraztuz. Erantzunetan, baikorrak pertsona horren garapen baikorra egin behar zuen, ondoren ezkorra besteak. Lan ederra osatu zuten Ibarzabal eta Colinak.

Bakarkakoetan, Colinari jarri zion bereziena. Gaia: Leku horretan sartzen zaren aldiro orduko bizipena berritzen duzu. Gai horrekin, hiru bakarkako desberdinen lehen bertsoa bota behar zuen Colinak. Baita intriga ederrarekin amaitu ere.

Fintasun maila bikainean joan zen saioa hasi eta buka. Bertsoaldi hautaketa Bertsoa.eus-en izango da aurrerago.