Lehena izango da 2022-04-13

Bizkaiko bertso munduko emakumeen Topaketa egingo da maiatzean

Bizkaiko bertso munduko emakumeen lehenengo topaketa egingo da maiatzaren 22an Markina-Xemeinen eta izena emateko epea zabalik da Bizkaiko Bertsozale Elkartean.

Topaketa honek Bizkaiko bertso munduko emakumeak batu nahi ditu eta helburu nagusia, beraz, bertsoaren inguruan dabiltzan emakumeak biltzea izango da, izan bertsolariak, bertsozaleak, gai-jartzaileak, epaileak edota antolatzaileak, elkar ezagutu eta saretzeko asmoarekin.

Batzar irekian adostuta
I. topaketa hau antolatzeko batzar irekia egin zen martxoan eta bertan adostu zen lehenengo topaketa honen oinarria gozamena izango dela, hau da, elkarrekin egon eta ondo pasatzea. Aurrerago etorriko dira hain beharrezko diren bestelako gogoetak eta hausnarketak.

Poteoa eta bazkal ondoan bertsoak
Eguna poteo txiki batekin hasiko da 12:30ean, ondoren bazkaria 14:30ean. Bazkal ostean, 17:00etan, bertso saioa egingo da, bertsolari askoren parte hartzearekin.

Izena emateko galdetegi labur bat bete behar da, eta bazkaria egunean bertan ordainduko da, 18€.