Txapelketa Nagusiko sarrerak salgai ekainaren 23tik aurrera

Sarrera guztiak www.bertsosarrerak.eus atarian

9:00etan hasiko da sarreren salmenta ekainaren 23an www.bertsosarrerak.eus atarian. Txapelketa osoko saioetarako sarrerak eskuratu ahal izango dira, bazkide, ez-bazkide eta gazte salneurriak bereiziz (gazteen sarrera 2004tik aurrera jaiotakoek baliatu ahal izango dute, urte honetakoak barne, eta 6 urtetik beherako haurrek ez dute sarrerarik beharko, baldin eta ez badute eserlekurik beteko). Erosketa online egiteko zailtasunak dituztenei laguntza emango zaie Bertsozale Elkarteetan, batez ere eten digitala saihesteko.

Fisikoki, Nafarroako Elkartearen egoitzan ere eskuragarri
Finalari begira, internetez ez ezik, Nafarroako Bertsozale Elkartean finalerako sarrera fisikoak eskudirutan erosteko aukera ere izango da ekainaren 23tik 30era: zerbitzu hau 10:00-14:00 eta 16:00-18:00 bitarte eskainiko da epe horretan.

Gainerako saioetarako sarrerak fisikoki erosteko aukera ere izango da irailetik aurrera, baldin eta lehenago amaitzen ez badira. Zehaztuko da aurrerago zeintzuk izango diren salmenta puntu horiek. Behin sarrera erosita, ezingo da aldatu eta ezta itzuli ere.

Finaleko sarrerak, 3 gune ezberdinetan

Iruñeko Nafarroa Arenan izango da aurten finala, eta, orain artean ez bezala, hiru sarrera mota ezberdin izango dira eskuragai: harmaila, errebotea eta pista. Sarrera mota guztiek salneurri bera dute. Taldean joanez gero, kide guztiek sarrera mota bera hartu behar dute elkarrekin esertzekotan. Sarrera mota bakoitzak sarbide jakin bat du, eta behin barrura sartuta ez da batekoak eta bestekoak elkartzeko modurik izango.

Beste aldietan bezala, sarrera mota bakoitzak prezioan eragiten duten ohiko azpimotak izango ditu: bazkideak, ez-bazkideak eta gazteak. Bestalde, aurrerago emango dira finalaren eguneko autobusen eta otorduen aukeren berri.

Ekainaren 23tik 30era, bazkideek sarrera gordeta finalerako

Bertsozale Elkarteko bazkideek lehentasuna eta prezio hobeak izango dituzte Txapelketa Nagusiko sarreretan. Ekainaren 23-30 bitartean, finaleko sarrera bermatuta izango dute bazkideek.

Ohiko galdera-erantzunak