Udako bertso agenda 2022-06-24

35 bertso ekitaldi San Joan bueltan

Ekainako azken astea, bertso plazari dagokionez, urteko garairik oparoenetakoa da, abuztu erdialdearekin batera, jai egutegia ere halakoa baita: San Joanak, San Pedroak, San Martzialak...

San Joanetako agendari erreparatuta, aurten 35 bertso ekitaldi inguru ageri dira agenda, 23tik 26ra bitartean, Euskal Herri zabalean: Algortan, Aiako Iturriozen, Tolosan, Hernanin, Barañainen, Mallabian, Irisarrin, Leioan, Larraitzen, Larrabetzun, Arrasaten, Berriatuan, Saldiasen eta beste hainbat herrietan.

Emanaldi bereziak ere utziko dizkigu San Joan bueltak: Gaur, Amallon, (Markina-Xemein), Mauriziak Ez Dau Inor Hil emanaldi inprobisatu-musikatu-irudiduna: Miren Amuriza, Nerea Ibarzabal, Oihana Iguaran eta Alaia Martin bertsotan, Amaia Agirrek gaiak jarrita. Parte hartuko dute baita ere Lorea Argaratek, Ines Osinagak eta Olatz Salvadorrek ere. 22:00etan.

Berriatuan, gaur, Berritxu gazte sariketa jokatuko da. Donostian, bihar, Erradikalak ginen emanaldiaren agurra, Dokan, 19:00etan. Abadiñon, Durangaldeko Kopla txapelketa izango da zapatuan.