'Ganbaran bai' atal berria Txapelketa Nagusian 2022-09-20

Aitor Sarriegik eta Sarai Roblesek bertsogintzari buruzko iruzkinak egingo dituzte txapelketan zehar Bertsoa.eus-en

Bertsoa.eus-ek Txapelketa Nagusiari gertuko jarraipena egingo dio. Bertsoak, bertsolarien saio osteko erreakzioak eta beste hainbat informazioz gain, txapelketa honetan iruzkinen tartea ere izango dugu, Ganbaran bai izenekoa. Sarai Robles eta Aitor Sarriegi bertsolariek bertsogintzan zentratutako beren iruzkin eta gogoetak plazaratuko dituzte, saioak abiapuntu gisa hartuta. Asteroko maiztasunez izango da Ganbaran bai atala eta aste bakoitzean bietako batek plazaratuko du bere iritzia. Asteartez lehenengo fasean eta astelehenez finalaurreetan.

Lehenengo iruzkina Aitor Sarriegi beasaindarrena izango da datorren asteartean, Getxo eta Arrasateko saioak abiapuntu. Ondoren, Sarai Robles iruindarrak jarraituko dio Gotaine-Iribarne eta Gasteizko saioen harira. Horrela astez aste eta finalean bien begirada jasoko dugu.