Ostiraletan asteroko maiztasunez 2022-09-21

Datorren astean itzuliko da 'Bertsolari bertsozale' podkasta

Bertsolari bertsozale podkastak udazkeneko ibiliari ekingo dio datorren astetik aurrera. Bertsolari eta bertso munduko hainbat eragile gertuagotik ezagutzeko parada gozoa emango digu: nondik nora bertsozaletu ziren, bertsolaritzan egindako bidea, bizipenak eta sentipenak, bertso gogoangarriak, Txapelketa Nagusia nola biziko duten... Xan Alkhatek onduta, ostiral goizetan zabalduko ditugu Bertsoa.eus-en. Joana Itzaina Bertsularien Lagunak Elkarteko lehendakari ohia eta gai-jartzailea izango da lehen gonbidatua. 

Urtarrilean abian jarrita
Pandemia garaian hasi zen Bertsoa.eus podkastak lantzen eta urtarrilean jarri genuen abian Bertsolari bertsozale, asteroko maiztasunez. Ekainera bitartean, hamasei gonbidatu izan dira beren atea zabaldu digutenak: Nerea Ibarzabal, Gorka Pagonabarraga, Amets Arzallus, Saioa Alkaiza, Beñat Gaztelumendi, Haira Aizpurua Ibargarai, Irati Anda, Bittor Thicoïpé, Alaia Martin, Joane Sarraillet, Kristina Mardaras, Manex Agirre, Daia Harluxet, Unai Agirre, Estitxu Arozena eta Irantzu Idoate Funosas.