Igandero 15:00etan ETB1en 2022-09-23

Hitzetik Hortzera txapelketaren erritmora

Denboraldiko bigarren atala berezia izango da bertsozale guztientzat; irailaren 24an, larunbata, hasiko baita Bertsolari Txapelketa Nagusia. Igandeko Hitzetik Hortzeranbezperan jokatuko den lehen kanporaketako bertsoaldi onenak ekarriko ditugu pantailara.

Getxoko egonaldia bertako sortzaile  bat ezagutzeko baliatuko dugu: Afrika Bibang. Soul abeslaria eta aurkezlea da Afrika eta getxoztarrarekin ezagutuko ditugu herriko zirrikituak. Proiektu desberdinak ditu esku artean, eta horiei buruz ere galdetuko dio Eider Perez aurkezleak.

Txapelketan zehar bidelagun izango ditugun bertsolariak atzera begira jarriko ditugu eta Bertsolari Txapelketa Nagusiei buruz dituzten oroitzapenak zeintzuk diren jakingo dugu. Besteak beste Maddi Agirre, Manolo Arozena, Erika Lagoma edota Anjel Mari Peñagarikano izango ditugu protagonista.

Getxoko kanporaketako bertsoaldiak

2022ko Bertsolari Txapelketa Nagusiak Getxon ekingo dio bideari eta igandeko programan lehen kanporaketako bertsoaldi onenak ikusi eta entzuteko aukera izango da. Kantuan arituko dira Agin Laburu, Alaia Martin, Nerea Elustondo, Oihana Bartra,Peru Abarrategi eta Unai Mendizabal. Gai-jartzaile lanak Imanol Artola “Felix”ek egingo ditu.

Hitzetik Hortzera, igandero 15:00etan ETB1en eta edonoiz, EITB Nahieran atarian ere bai.