Txapelketa Nagusia 2022-09-25

Arrasaten gaur hitzordua

Atzo Getxo eta gaur Arrasaten izango du bigarren hitzordua Txapelketa Nagusiak. Miren Amuriza, Gorka Pagonabarraga, Saioa Alkaiza, Xabat Illarregi (Xabier Silveiraren ordez), Joanes Illarregi eta Iñaki Apalategi, Ander Aranburuk aurkeztuta. Gaztetasuna eta esperientzia biltzen dituen saioa da eta baita fase honetan bertsolari nafar gehien bilduko dituena ere.

Miren Amuriza berriztarrak laugarren Euskal Herrikoa du jarraian eta finalaren ataria gelditu zen duela bost urte. Iñaki Apalategi beasaindarrak hirugarren txanda du aurtengo hitzordua. Saioa Alkaiza Nafarroako txapeldun iruindarrak lehengo aldiz kantatuko du igandean Txapelketa Nagusian, baita Joanes Illarregi zein Xabat Illarregi leitzarrek eta Gorka Pagonabarraga durangarrak ere.

Lehenengo fasean eta finalaurrekoetan zazpi epaile ariko dira bertsolarien lanak epaitzen, fase bakoitzean epaile berak. Arrasaten ere honako zazpiok ariko dira: Egoitz Iradier Martinez de Albeniz, Eneko Bidegain Aire, Jurgi Fuentes Goikoetxea, Karlos Ibarguren Olalde, Leire Beloki Lizarralde, Miriam Juaristi Urizar eta Saioa Mitxelena Irazoki.

15 puntuagarri
Lehen fase honetan bertsolariek txapelketako ohiko lanak egingo dituzte. Denera 15 bertso puntuagarri, ariketa hauetan banatuta:
    Binaka, gaia emanda, hiruna bertso zortziko handian.
    Binaka, gaia emanda, hiruna bertso zortziko txikian.
    Banaka, lehen puntua emanda, hiru bertso zortziko txikian.
    Binaka, gaia emanda, hiruna bertso hamarreko txikian.
    Ganbarako lana: banaka, gaia emanda, hiru bertso nahi den doinu eta neurrian.

Sarrerak, eskuragai
Txapelketako sarrerak www.bertsosarrerak.eus atarian daude eskuragarri. Agortuko ez balira, saioaren egunean bertan leihatila 15:00etan zabalduko da. Saioa hasi baino orduerdi lehenago zabalduko dira ateak, 16:30ean. Sarrerak zenbakitu gabeak dira, beraz, garaiz ibiltzea gomendatzen da.