Txapelketa Nagusia 2022-10-01

Nerea Ibarzabal irabazle Gotaine-Irabarnen

Nerea Ibarzabal gailendu da Gotaine-Irabarnen jokatutako kanporaketan, 738 punturekin eta Oihana Iguaranek egin du bigarren, puntu erdira. Ibarzabal eta Iguaranekin batean, Ane Labaka, Eneko Lazkoz, Julio Soto eta Patxi Iriart aritu dira bertsotan, Aritz Bidegainek aurkeztuta. Lan puntuagarriak eginda, honako hau da puntuaketa:

Nerea Ibarzabal 738
Oihana Iguaran 737,5
Ane Labaka 694,5
Julio Soto 691
Eneko Lazkoz 649,5
Patxi Iriart 604,5

Markina-Xemeindarrak Irungo finalurrekoan kantatuko du, azaroaren bostean. Oraingoz, Sustrai Colina dago saio horretarako sailkatua.





Lehenengo fasean osoan bezala hurrengo epaile taldea aritu da lanean: Egoitz Iradier Martinez de Albeniz, Eneko Bidegain Aire, Jurgi Fuentes Goikoetxea, Karlos Ibarguren Olalde, Leire Beloki Lizarralde, Miriam Juaristi Urizar eta Saioa Mitxelena Irazoki.

Igandean Gasteizen
Igandean Gasteizen laugarren kanporaketa: Amaia Iturriotz Etxaniz, Haritz Mujika Lasa, Iban Urdangarin Lardizabal, Manex Agirre Arriolabengoa, Miren Artetxe Sarasola eta Xabat Galletebeitia Abaroa. Oier Azkarraga Grajalesek egingo ditu aurkezle lanak. Europa Biltzar Jauregiko Maria de Maeztu entzunaretoan izango da saioa, 17:00etan hasita.

Miren Artetxek du Txapelketa Nagusian eskarmentu gehien taldean. Xilabako txapeldunordeak laugarren edizioa du aurtengoa eta aurrekoan ez zen finaleko postuetatik urrun ibili. Iban Urdangarin eta Manex Agirrek bigarren aldia izango dute. Amaia Iturrioz, Haritz Mujika eta Xabat Galletebeitiak igandean izango dute lehen aukera.


Sarrerak, eskuragai
Gasteizko saiorako sarrerak www.bertsosarrerak.eus gunean daude eskuragarri. Gasteizen bertan, 15:00etan irekiko da leihatila eta 16:00etan, berriz, aretoetako atea.