Txapelketa Nagusia - lehen fasea 2022-10-06

Donostian eta Lizarran lehen faseko azken bi saioak

Donostia eta Lizarrako saioekin amaituko da Txapelketa Nagusiko lehen fasea. Sei irabazleak eta 13 puntuaziorik onenak aurrerarako. Donostian, larunbatean, Victoria Eugenia antzokian, 17:00etan, honako sei bertsolari hauek kantuan: Aitor Etxebarriazarraga Gabiola, Beñat Iguaran Amondarain, Eñaut Martikorena Lizaso, Jone Uria Albizuri, Maddalen Arzallus Antia eta Onintza Enbeita Maguregi. Gai-emaile lanetan Leire Garatxena Larrabe ariko da. Sarrerak agortuta daude baina Bertsoa.eus-en zuzenean jarraitu ahal izango da saioa.

Azken saioa Lizarran
Lehen faseko azken saioa Lizarran jokatuko da igandean, Los Llanos aretoan, 17:00etan. Bertsotan, Aitor Bizkarra Ruiz, Asier Azpiroz Iztueta, Imanol Uria Albizuri, Iñigo Mantzizidor Larrañaga 'Mantxi', Maialen Akizu Bidegain eta Unai Gaztelumendi Arandia. Saioaren gidari lanetan, berriz, Amaiur Lujanbio Agirre ibiliko da.

10 postu jokoan, matematikoki
Faseko azken saioetan kalkulagailuak ohi baino berotu handixeagoa hartu ohi du. Alaia Martin, Joanes Illarregi, Nerea Ibarzabal eta Haritz Mujikarekin batean, asteburuko bi irabazleak zuzenean sailkatuko direnez, azken bi saio hauek sailkapeneko 10 postu jarriko dituzte jokoan. Oihana Iguaran, Nerea Elustondo eta Ane Labaka beraz, matematikoki daude sailkatuta joan den astetik. Hortik behera estatistikak hasten dira lanean. Dantzan jarriko diren 10 postu horien artean, azken seietan daude, hurrenkera honetan, Iñaki Apalategi, Iban Urdangarin, Xabat Illarregi, Xabat Galletebeitia, Oihana Bartra eta Eneko Lazkoz.