Ostiralean jokatu zen Elizondon eta Erratzun 2022-10-25

Sarai Robles txapeldun Mariano Izeta Sariketan

Nafarroako bertsolari gazteen X. Mariano Izeta Sariketa jokatu zen ostiralean Elizondon eta Erratzun. Sarai Robles barañaindarrak jantzi zuen txapela eta Ekhiñe Zapiain gelditu zen bigarren, eta berak jaso zuen bertso onenaren saria.

Hamasei bertsolari izan ziren kantuan sariketan. Arratsaldez, kanporaketak jokatu ziren tabernetan eta gauean finala, Kortarixar jatetxean. Peio Ardaiz, Patxi Castillo, Bittori Elizalde, Urko Gartzia, Egoitz Gorosterrazu, Ainara Ieregi, Mikel Lasarte eta Sarai Robles aritu ziren lehen kanporaketan. Bigarrenean, Ekain Alegre, Beñat Astiz, Etxahun Azkarraga, Idoia Granizo, Endika Legarra, Jabi Lezaun, Eki Mateorena, Ekhiñe Zapiain.

Kanporaketa bakoitzeko lehen hirurek osatu zuten finaleko seikotea: Sarai Robles, Bittori Elizalde eta Patxi Castillo, Elizondoko Intza ostatutik. Ekhiñe Zapiain, Ekain Alegre eta Eki Mateorena Erratzuko Zubi-punta ostatuko saiotik.

Finala Elizondoko Kortarixar jatetxean jokatu zen, 70 bertsozaleren beroan, Zigor Gartzia "Zian" gai-jartzaile zela. Epaile lanetan, Amaia Telletxea, Cesar Etxeberria, Izaro Mitxelena, Joseba Beltza eta Julen Zelaieta.

Sailkapena
Sarai Robles        333,5  puntu
Ekhiñe Zapiain    320,5, 
Ekain Alegre       302  
Patxi Castillo       297  
Eki Mateorena     295
Bittori Elizalde    252

Bi sariak, txapela zein bertso onenarena, Juana Mari Izetak, Mariano Izeta zenaren alabak, banatu zituen.