Konparaketaren zamak eraginda 2022-11-09

Beñat Lizasok plazak uztea erabaki du

Beñat Lizaso bertsolari azpeitiarrak plazari agur esango dio, Lizaso abizenaren pisuak eta konparaketen zamak eraginda bereziki. Aitortu du abizenak ate asko zabaldu dizkiola, baina ate estuak eta pasatzean beste aldean zer zegoen erakusten ez zutenak. «Jendeak Lizaso entzun nahi zuen, ez Beñat». Beñatek plazako atea ixteko erabakia iragarri du Bertsolari Aldizkariaren Makarrizketak podkastean.

«Gorroto ditut konparazioak»
«Gorroto ditu konparazioak. Konparazio bat dagoen bakoitzean beti dagoelako bat bestea baino hobea, bat bestea baino gehiago», azaldu du Lizasok, eta onartu du berak etenik gabe sentitu dituela halakoak bertsolari ibilbidean. «Neure larruan bizi izan dut konparazioen zartailu mingarri hori. Lizaso abizena izate hutsak nire aurretik izan diren bi bertsolari handiren itzalera narama». Askotan sentitu du «abizenagatik» deitu izan diotela bertso saio batzuetarako. «Abizenak ate asko ireki dizkit, aukera asko, baina jendeak Lizaso entzun nahi du, eta ez Beñat».

Beñat Lizaso gazterik hasi zen bertsotan eta urteetako bidea egin du plazan nahiz txapelketan. 2019an Gipuzkoako Finalean kantatu zuen. 2022ko Txapelketa Nagusian parte hartzeko eskubidea zuen baina ezezkoa erabaki zuen, txapelketa bideari agur esanez, Gipuzkoako Finalak utzitako pozarekin, Bertsoa.eus-i adierazi zionez.