Durangaldeko bertso eskolaren eskutik 2023-03-06

Durangaldea Uztabarritzen III. Bertso zirkuituak sei plaza dakartza

Durangaldea Uztabarritzen III. Bertso zirkuitua ostiralean hasiko da eta sei jaialdi ekarriko ditu aurten martxoan eta apirilean. 25 bertsolarik hartuko dute parte eta horietatik 18 eskualdekoak izango dira, proiektuaren filosofiari jarraiki. Baita sei gai-jartzaileak ere. Aldi berean, oholtza berean plazan esperientzia desberdina duten bertsolariak uztartuz.

Lehenbiziko saioa ostiralean Berrizen
Lehenbiziko saioa ostiralean izango da Berrizen, martxoaren 10ean, 19:00etan Topa tabernan: Erika Lagoma, Ander Elorriaga, Eli Pagola eta Bittor Altube ariko dira bertsotan, Miren Amurizak gaiak jarrita.

Ondorengoak, Zornotzan, Elorrion, Garain, Mañarian eta Otxandion egingo dira.

Pandemia garaian sortutako ekimena
Durangaldea Uztabarritzen Bertso zirkuitua pandemia testuinguruan sortu zen, bertso plazan izan zuen geldialdiari aurre egiteko. 11 saio antolatu zituzten orduan. Plantemenduari buelta bat ematea erabaki zuten saioen erakargarritasuna indartzeko eta azken bi urteotan 7 eta 6 antolatu dituzte.



Jaialdiak baina espazio anitzetan
Bertso zirkuitu honen beste ezaugarrietako bat da plaza aniztasuna. Ekitaldi guztiak jaialdi formatukoak izan arren, espazio desberdinetan egingo dira, giro aniztasuna helburu: tabernetan, gaztetxean, probalekuan...