Martxoan Bertsoa Urretxu-Zumarragan 2023-03-10

Martxoan Bertsoa taldekako txapelketako kanporaketa gaur

Martxoan Bertsoa ekimenaren 21. edizioa abian da Urretxu-Zumarragan eta gaur jokatuko da taldekako txapelketaren bigarren kanporaketa, Soraluzen tabernan, 22:30etan. Hiru talde ariko dira kantuan: Botxan Magoa (Mikel Iturriotz, Arkaitz Aizpuru eta Beñat Torres), Xelebrek (Uhaitz Oiartzabal, Gorka Murua eta Sustrai Goenaga) eta Gorka ta konpainia (Gorka Santesteban, Uxue Fernandez eta Aitor Lizarazu).

Hirugarren kanporaketa datorren ostiralean jokatuko da, Zumarragako Urola tabernan. Hitzurde larrosak (Amaia Iturriotz, Antton Fernandez eta Eneko Beretxinaga), Bandolerok (Jon Mendizabal, Joseba Salegi eta Martin Sagastibeltza) eta Xamuir (Irati Sanchez de Arevalo, Samuel Segade eta Xabier Meabe) taldeek parte hartuko dute.

Bertso Olariak taldea.

Lehen kanporaketa joan den astean jokatu zen eta Legazpiko Bertso Olariak taldeak lortu zuen finalerako txartela: Lierni Ugarte, Ane Beloki eta Jone Narbaizak.

(Argazkiak: Otamotz)