Larunbatean, Laudion 2023-03-23

Gasteiztarrak eta aramaioarrak prest Arabako Kuadrilla arteko finalerako

Larunbatean jokatuko da Laudion Arabako Bertso Kuadrilla artekoaren 7. finala Laudion, urtarrilean hasitako bidea borobilduz. Gasteizko bi talde eta Aramaioko bat izango dira finalean: Katuko muinoak eta Errexela gasteiztarrak eta Aramaioko Izena pentsau bida.

Egun osoko festa izango da larunbatekoa eta eguerditik bilduko dira Laudion. 12:00etan poteoa, 14:30etan bazkaria eta 17:00etan izango da finala, Laudioko BHI kiroldegian.

Errexela taldeko taldekideak (albisteko argazkian): Felipe Zelaieta, Ainara Balantzategi, Marta De Pedis, Kerman Lopez de Lacalle, Jokin Estepa eta Asier Otamendi.
Katuko muinoak (beheko argazkian): Eli Zaldua, Iñaki Viñaspre, Xabier Antia eta Ekaitz Samaniego.

Aramaioko Izena pentsau bida taldeko kideak, saioetako batean: Martin Abarrategi, Danel Herrarte, Manex Agirre eta Sabin Abarrategi.

15 saio, urtarrilean hasita
Urtarrilaren 27an hasi zen Arabako Kuadrilla artekoa eta 15 saio jokatuta iritsi da finalera. 12 talde aritu dira bat-bateko alorrean eta bertso jarrien atala ere izan du. Arabako bertsolaritzaren oinarria lantzea helburu duen ekimenak 300 lagun inguru bildu ditu lan eta ardura desberdinetan.