Gipuzkoako Eskolarteko txapelketa 2023-04-02

Gipuzkoako Eskolarteko finalistak erabakita

Gipuzkoako Eskolarteko Txapelketako finalistak erabaki dira, ostiralean Amezketan laugarren eta azken kanporaketa jokatuta. Azken saioan Danel Etxeberriak irabazi zituen kanporaketa eta finalerako zuzeneko txartela. Berekin batean aritu ziren Xuban Urdalleta, Oihan Navarro, Nikola Iraola eta Lide Arregi, Haritz Alberdi gai jartzailearen esanetara. Epaile lanetan Mikel Lersundi, Leire Beloki eta Karlos Ibarguren.

Finalean lau kanporaketetako irabazleak eta bi puntuazio altuenak ariko dira: June Aiesteran (Legazpiko irabazlea); Amets Aizpurua (Zarauzko irabazlea); Izar Zelarain (Errezilgo irabazlea), Danel Etxeberria (Amezketako irabazlea), Jon Mendiluze eta Beñat Zeberio. Txapelduna eta txapeldunordea Euskal Herriko finalerako sailkatuko dira. Iaz, June Aiestaranek jantzi zuen txapela eta Jon Mendiluze gelditu zen bigarren.

Finala Lasturko tabernan izango da eta afaritarako txartelak salgai daude dagoeneko www.bertsosarrerak.eus atarian.