Lehenengoz egin da aurten 2023-04-12

176 gaztetxo Gelatik Plazara bertsotan Gipuzkoan

Bertso eskoletako gaztetetxoak bertsotan jarri ditu Gipuzkoako Bertsozale Elkarteak Gelatik Plazara ekimenean. Herrialdeko zazpi eskualdeetan saio bana egin dute bat-batean eta jendaurrean trebatzeko esperientzia gisa. Urola Kostan, Debagoienan, Debabarrenan, Urolan, Tolosaldean, Buruntzaldean eta Goierrin izan dira saioak martxoaren 3an hasi eta 31 bitartean.

Lehenengo edizio honetan 14 urtez azpiko 176 gaztetxok hartu dute parte taldeka eta bertso eskoletan egiten duten hori jendaurrean eskaintzeko aukera izan dute, Gipuzkoako Bertsozale Elkarteak aditzera eman duenez. «Gelatik Plazararen helburuak tokian tokiko bertso eskoletako ikasleek elkar ezagutu eta gela barrutik plazara jauzi egiteko zubi lana egitea izan dira, eta gozatu ederra hartu dute bai kantuan aritu direnek eta baita entzutera hurbildu direnak ere».