Ostiralean jokatu zen finala Lasturren 2023-04-24

June Aiestaran Gipuzkoako Eskolarteko txapeldun

Eskolarteko txapelketak badu lehenbiziko txapelduna eta Euskal Herriko lehen bi finalistak ere bai. June Aiestaran bertsolari beasaindarrak irabazi zuen ostiralean Gipuzkoako Eskolartekoa, bigarren urtez jarraian, Lasturren jokatutako finalean. Danel Etxeberria gelditu zen bigarren eta biak Euskal Herriko finalean izango dira.

Lasturko ostatuan jokatu zen finala, afalondoan, 90 lagun inguru bilduta. Aiestaran eta Etxeberriarekin batean kantuan, Izar Zelarain, Amets Aizpurua, Jon Mendiluze eta Beñat Zeberio, Ane Ezenarrok aurkeztuta. Epaile lanetan, Maite Sukia, Oihana Aranguren eta Bakarne Urreaga.

June Aiestaranek Unai Mendizabal Harituzeko kidearen eskutik jaso zuen txapela. Tolosaldeko Bertsozale Elkarguneak 10 urteko bidea borobildu du aurten, plazan zein bertso eskoletan lan handia eginez eta Gipuzkoako Bertsozale Elkarteak lan horri aitortza egin nahi izan dio. Finaleko seitik bost bertsolari Harituzen ibiltzen dira. Aiestaran, Goierrin eta bietan.


Final ederra
Sei bertsolariek maila handiko eta erritmo oneko finala eskaini zuten eta denek utzi zituzten ale ederrak.
Bertsoa.eus ere Gipuzkoako Eskolarteko finalean izan zen eta astean zehar bertsoaldi hautaketa jarriko du sarean.