Ahalduntze Bertso Eskola feministaren jaia 2023-06-21

Bertso* Eguna, saretu eta lekua egiten jarraitzeko

Joan den larunbatean Bertso*Eguna ospatu zen Durangon eta Iurretan, Bertsozale Elkarteak bultzatutako Ahalduntze Bertso Eskola Feministaren eskutik. «Ahalduntze bertso eskola proiektua ezagutaraztea, hurrengo ikasturterako jendea proiektura gonbidatzea, emakume* bertsolarien artean saretzen jarraitzea, eta umorea ardatz hartuta bertso munduan gure lekua egiten jarraitzea» izan dira helburu nagusiak. Eta horrez gain, «aurtengo ikasturteari itxiera eman eta hurrengo urterako pilak kargatzea» adierazi du Ainhoa Urien Ahalduntzeko arduradunak.

Eguna bertsotan
Bertsoz ondo betetako eguna izan zen zapatukoa. Goizeko poteoan hamar bertsolarik kantatu zuten, eta arratsaldeko saioan zortzik. Bi saioetako gaiak eta aurkezletzak bertso eskolako hiru gai-jartzaileek egin zituzten. Hartara, bertso eskolako partaide gehienek parte hartu zuten egun guztian zehar. Bazkarian 30 lagun elkartu ziren. Eguna borobiltzeko, eRRe ikuskizunaren azken emanaldia izan zuten. «Giro onean joan zen eguna» Urienen hitzetan.



«Datorren ikasturterako proiektua indartsu»
Ahalduntze Bertso Eskola Feminista hamarkadarako bidean da eta Bertso*Egunean «argi geratu zen datorren ikasturtera begira proiektua indartsu dagoela. Partaideek jarraitzeko gogoa adierazi zuten, baita jende berriak gure taldera batzekoa ere. Saretzen jarraitu nahi badugu ezinbestekoak dira horrelako proiektuak eta proiektu horiei gorazarre egiten dieten egunak. Guregatik eta guretzako geuk egindakoak».